عارف انك سمعت الكلام قبل كدة، بس و الله اكلام صح … اسمعه تاني!
-لو عملت اللي بتحبه، ح تبقى مبسوط…. و ح ترضى… و تعمل فلوس، ولو الدنيا خنقت، ح تفضل فاكر انك اخترت بإيدك السكة دي… ده اللي انت بتحبه. في كل الأحوال، كل الطرق تؤدي للــ “خنقة”، ف يستحسن تبقى خنقة بتحبها!

-كان في مهندس كبير في السن، و صديق ليا، قال:
اوعى تفكر تغير التاريخ وانت حاسس انك بتضحي، أو بتخسر مالك أو وقتك… الصح انك تقول:
ح اغير التاريخ… و ح ابقى مبسوط… و ح أعمل اكبر ثروة وانا بغير التاريخ!

أظن، مهم من وقت للتاني، تدور على حد مجنون، زيك… تحكي له “شغفك” بفكرة مجنونة، ما حدش ح يصدقها… بس انت واثق انك ممكن تغير المعادلة. حتى لو ده مش سليم… أو صح… او مش ح يحصل… كفاية انك بتعرف “تحلم” في وسط بركة كلها سواد!

الشغف حلو على فكرة… يخليك تحس بقيمة العمر، بلذة نسمة الهوا… أظن من غيره الدنيا كتمة و خنقة و ريحتها عرق (يع!).

دور على حد مجنون تكلمه من وقت للتاني، و صدق أحلامك… وافرح انك بتحلم… وإحمد ربنا على “الأحلام”… ربنا يسعد الكل.

تصبحوا على شغف!

Comments

comments