الوحدة

اتعلمت كل اللي أنا عاوزة ومفيش داعي إني استمر … إني اتحول لموظف روتيني …
بس الجزيرة تجربة عميقة … لسة مش قادر أقول لها كفاية … لسة  شوية … بس وقت ما أشعر إني بدأت أتحول لموظف روتيني … هامشي … وابدأ رحلة جديدة في مكان جديد !

اللي باعمله ده صح ولا غلط … مش عارف … ومش عاوز أعرف … كل اللي أنا متأكد منه … إني مبسوط :)

وده كفاية عليا

بس المتعب في الحكاية كلها هو الوحدة … الوحدة إنك متلاقيش حد يتجنن معاك … كل قراراتك هتاخدها لوحدك – مهما استشرت – لإنك بتتحمل مسئوليتك وحدك ومحدش بيشاركك في ده … مفيش حد كتفه في كتفك … تسنده ويسندك …

القصة كلها … هل تحافظ على وحدتك علشان تفضل طول عمرك مجنون … تشيل فكرة في قلبك وتفضل تحارب علشانها الدنيا كلها … ولا تهزم وحدتك بس تمشي على جنب الطريق … خايف على اللي معاك … تعيش حياة هادية ولطيفة … وتحلم أحلام على قدك

سرحت بخيالي مرة ولقيت نفسي متزوج واحدة مجنونة … بتصور وبتكتب … نلف كل بلاد الدنيا أنا وهي بس نعمل أفلام مجنونة … ونكتب حكايات مجنونة … إحنا كل الفريق … نكبر مع بعض … ونحلم مع بعض … نفضل ماشيين وسط الطريق … مش على جنب … ولما الشعر يشيب … منفتكرش كام بلد شفنا … بس هيبقي لينا في كل مكان ذكريات :)

Comments

comments