d
التعامل مع خناقات الأطفال الأشقاء
How to manage siblings struggle…
لما نفكر إن كل حاجة في معاملتنا للطفل بتأثر على تفكيره بعد كدة هنعرف إن الأطفال هم أهم مشروع يستحق وقت ومجهود في حياتنا…
مشكلة مهمة بتواجه كل الناس هو الخناقات بين الاخوات:
ازاى تتعامل معاها:

1- تسألهم عن سبب الخناقة..كتير الاطفال بيطلعوا مشاعر تانية في صورة خناقات مع اخواتهم..تسأله ايه اللى مضايقك فعلا.،.ممكن يكون اللى مضايقه انه حاسس مثلا انك أمه متجاهلاه أو انك امبارح وهو بيكلمك سبتيه ورحتى اتكلمتى فى التلفون…انك تشجعه يظهر مشاعره الحققية ده هيقلل من الخناق.

2- نحط قاعدة ثابتة وهى إن الاحترم قاعدة لا يمكن اختراقها لأن اختراقها فيه عقاب واضح…يعني الشتيمة و الألفاظ النابية ممنوعة و لا يصح انه يقولها لأخوه أو أخته مثلا.

3- إن وقت الخناقة أو الاختلاف لازم تسمع للطرفين وبدون محاباة وبدون ملل و تعرف السبب بتاع الطرفين…مثلا ” اصل فلانة دائما بتختار الأول”” اصل هو اخد حاجتي…” و غيرها….الانتباه لازم جدا..

4-لازم نفهم الطفل احنا بنختار حاجات معينة و بنعملها ليه حسب فهمه ومنطقه.. لازم تفهم إن الطفل وحتى سن المدرسة تقريبا بيبقي فكرة العدل عنده هي تحقيق مطالبه فوريا.. ودي حاجة ممكن تفهميها له.. إن احيانا اللى احنا عاوزينه ماينغعش ناخده فى ساعتها لأن المكان مش مناسب مثلا…بعد كدة على 6 او 7 سنين الطفل ببقي مفهوم العدل عنده هو المساواة…فلما تقوليله نام بدري يقولك اشمعنى اخويا بينام بعد منى…ممكن تفهمه وماتقولوش “هو كدة” وتقوله لأنه أكبر منك لما تبقي قده هتنام فى وقت زيه…

5- لازم تفهم ولادك إن العيلة دي فريق كلها بتشتغل مع بعضها و إن كثرة الاختلافات بيننا هتخلينا ضعاف.

6- لازم تفهم الطفل لو سألك على حاجة معينة إنك ممكن نكون بتعاملهم بطريقة مختلفة عشان هم مختلفين.

7- ماتحولش تقارن الاخوات ببعض لأن ده بيخلق نوع سخيف جدا وفيه ضغط كبير جدا من المقارنة.

8- لازم يكون في وقت ثابت تقعد مع كل واحد فيهم لوحده و تعملوا فى اى نشاط سوا…ساعتها دايما هيقولك على حاجات مش بيقولهالك في البيت عادى.

9- اسوأ شىء مكن يحصل ان الاطفال وقت المشكلة يكلموك و تقولهم لا أنا مش فاضى أو خلاص مانتوش لاعبين أو ابعدوا عن بعض من غير ما تساعدهم في حل المشكلة.

10- ساعات بيكون الحل إنك تديهم هم الاختيار يعني فلنفرض انهم بيتخانقوا على التلفزيون مثلا..كل واحد عاوز حاجة و انت اخترت وماعجبهوش قلهم طيب انتم ايه رأيكم تحبوا نحلها ازاى…غالبا الاطفال هيطلعوا بفكرة و لانها فكرتهم هيلتزموا بيها لوحدهم.

11- الاطفال دايما بيقلدوا اهلهم..يعني لو الام والاب وقت الاختلافات بيكونوا راقيين وهاديين وبيقعدوا يتناقشوا عشان يوصلوا لحل غالبا الاطفال هتكون دي طريقتهم…
***** مهم جدا: لازم تفكر بعقل الطفل عشان تفهم منطقه..و لازم تفكر إن حاجات بسيطة ممكن تقولها بتأثر جدا فيه..زي انا مش فاضى…امشى دلوقني..فلان اشطر منك…و هكذا من امور مكن تكون انت ماتقصدهاش…

Comments

comments