لاستكمال الدراسة بالخارج

للمهتمين بالتقديم للدراسات العليا في أمريكا
بوست خاص بامتحان ال GRE: 

أسوأ كوابيس أي حد ناوي يكمل دراسته في أمريكا هو امتحان ال GRE. طبيعة الامتحان ، نوعية الأسئلة ، السكور المطلوب .. الخ. كلها حاجات بتخللي للإمتحان ده رهبة أقرب برهبة الثانوية العامة. 

-مبدئياً الامتحان مطلوب كشرط للتقديم للدراسات العليا في معظم الجامعات الأمريكية. الهدف من الامتحان مش العكننة على حضرتك ، الهدف قياس المستوى التعليمي لطلبة جايين من جامعات مختلفة ، و دول مختلفة بمقياس ثابت يضمن حد أدنى من العدالة في القياس.
-الاستعداد للامتحان بيتطلب مش أقل من 3 شهور ، و ممكن يوصلوا ل 6 شهور على حسب مدى تحمسك للمذاكرة. أول و أهم خطوة انك تبتدي.

-البداية بتكون الدخول للموقع الرسمي للامتحان http://www.ets.org/gre و اختيار الدولة و المدينة اللي حتمتحن فيها و حجز ميعاد للامتحان. الخطوة دي مهمة لأنها بتلزمك بميعاد محدد تذاكر على أساسه ، لأنك لو سبت نفسك من غير deadline حتفاجأ ان شهر بيعدي ورا شهر من غير أي انجاز يُذكر.

-الخطوة التانية انك تفهم طبيعة الامتحان. الامتحان مقسم لثلاث أقسام: قسم بيقيس المهارات الرياضية ، قسم بيقيس المهارات اللغوية ، و قسم بيقيس القدرة على الكتابة التحليلية. الامتحان نفسه أحد أكبر التحديات اللي فيه هو انه بيستمر لأربع ساعات متواصلة مطلوب منك انك ما تفقدش فيهم طاقتك و تركيزك ، فبيكون التحدي الأساسي في فترة الاستعداد هو التعود على التحمل.

-اختيار المراجع اللي حتذاكر منها هو أحد أهم الخطوات اللي بعد كده. أنا شخصياً ابتديت بالكتاب الرسمي اللي بتصدره ال ETS و ما ارتحتش ليه. الكتاب اللي ريحني شخصياً كان كتاب كابلان http://amzn.to/1o4dGWi. الكتاب بيغطي بالتفصيل الأجزاء الثلاثة الخاصة بالامتحان ، و بيعلمك مهارات لإجابة الأسئلة بشكل صحيح في أقصر وقت ممكن لأن الوقت عامل شديد الأهمية في الامتحان. أحد المميزات برضه اللي بيديهالك الكتاب هو access للموقع بتاعهم اللي بيخليك تتدرب على أسئلة و تحل نماذج شديدة الشبه بالامتحان الأصلي و محكومة بوقت محدد.
ايه أهمية التدريب ده؟ أهميته أولا انه بيبين لك نقاط الضعف بتاعتك و بيساعدك تشتغل عليها ، و ثانيا انه بيديك مؤشر على السكور المتوقع و اللي بيكون قريب جداً من السكور الفعلي اللي بتوصل له في الامتحان فبتعرف انت فين بالضبط.

-الأغلبية العظمى من اللي أعرفهم كانت مشكلتهم الأساسية في الامتحان مش الجزء الخاص بالرياضة لأن مستواه مش صعب (مستوى امتحان الجبر و الهندسة بتاع ثانوية عامة). الأغلبية كانت مشكلتهم في الجزء المتعلق باللغة لأنه بيستخدم مفردات عجيبة جدا ما وردتش على حد قبل كده ، أحيانا حتى للي لغتهم الأصلية الانجليزية.
طب الحل ايه؟؟ فيه حل انك تقعد لمدة 6 شهور تحفظ كل يوم عشر كلمات جديدة لحد ما تجمع لك بتاع ألف كلمة تدخل بيهم الامتحان.
و فيه الحل الأكثر عملية من وجهة نظري و هي انك تلجأ لكتاب زي دهhttp://amzn.to/Txvv5i. الكتاب ده بيعتمد على انه يعمل حيل على ذاكرتك بربط الكلمات المبهمة الغريبة بكلمة أبسط سهل تفتكرها و تفكرك بمعنى الكلمة. انت شخصيا ممكن بعد شوية تلاقي نفسك بتبتدي تخترع كلمات شبيهة بالكلمة الأصلية الصعبة عشان تسهل عليك تحفظها. عن تجربة .. دي أفضل طريقة لحفظ و تعلم الكلمات الصعبة.

-الاستراتيجية التانية هي انك تتعلم جذور الكلمات. يعني الأصل اللي لما تلاقيه في الكلمة بيدي معنى محدد و بيسهل عليك تستنتج بالشبه معنى مقارب للكلمة. اللستة الكاملة بالجذور دي و أمثلتها برضه متوفرة في كتاب كابلان. كان متوفر كمان في الكتاب نصائح بتعلمك ازاي تقرا باراجراف ، ازاي تركز على الأفكار المهمة ، ازاي تجاوب على الأسئلة المطروحة ، و ازاي تكتب المقالات التحليلية بشكل مرتب يضمن لك سكور كويس.

-طب ايه هو السكور الكويس؟ مفيش قاعدة محددة. فيه متوسط للسكور بيزيد و يقل على حسب مستوى الجامعة اللي حضرتك مقدم لها. مكالمة تليفون أو زيارة لموقع الجامعة بتديك مؤشر على المتوسط اللي محتاج تشتغل عليه أو تجيب أعلى منه شوية.

-فيه ناس احتاجت تدخل الامتحان أكتر من مرة عشان توصل للسكور اللي هي عايزاه ، فيه ناس زي حالاتي جابوا سكور كويس من أول مرة. في الآخر كله محصل بعضه لأن من حقك تختار أنهي امتحان تبلغ بنتيجته الجامعة اللي انت مقدم لها.
أهم حاجة هي انك تدي نفسك وقت كافي للتدريب على الامتحان و حل النماذج ، و انك تكون هادي الأعصاب و انت بتحل و تجاوب للآخر حتى لو اتهيأ لك انك مش عامل كويس. عادة ده بيكون بس ضغط عصبي و بتلاقي النتيجة في الآخر أفضل من توقعاتك. نصيحة كمان ، الامتحان بيكون متبرمج بحيث انه يتغير حسب مستوى اجابتك فاجتهد انك تجاوب على الأجزاء الأولانية بأحسن اجابات ممكنة لأن ده بيحطك اوتوماتك في الشريحة الأعلى.

-و نصيحة أخيرة .. ما تخلقش لنفسك بعبع من أي حاجة. لا امتحان و لا تقديم في جامعة و لا مناقشة رسالة تستاهل انك تعكنن على نفسك عشانها. كله بيعدي .. بالهدوء و الصبر بيعدي.
بالتوفيق للجميع.

Comments

comments