صورة مشوهة

  كان مركب سبحة زرقاء في عربيته في بلجيكا ، سألته ليه: قال لإن اللي بيسرق هنا مغاربة، ولو شاف السبحة هيعرف إنك عربي ومسلم ومش هيسرقك … أصول برصة 


قصة شهيرة في مدينة أنتورب. شاب مغربي صاحب واحدة بلجيكية … البلجيك من حقهم يأجروا طيارات هيلكوبتر وفقا للقانون هناك. الشاب والبنت أخدوا الطيارة وأجبروا السواق تحت تهديد السلاح إنه يطلع على السجن هناك عشان يهرب أصحابه. قصة صادمة طبعا للمجتمع الهاديء جدا هناك. صورة البنت البلجيكية والشاب انتشروا في كل مكان، وأصبح الدرس المستفاد هو إن البنت اللي هتصاحب مغربي مسلم هتضيع زي ما صاحبتكم ضاعت

من شوية في مطار مدريد قابلني واحد بيقول إنه ألباني، مسلم، وقعد يحلفني بأيمانات المسلمين إن فيه طيارة راحت عليه ومحتاج 20 يورو يكمل على فلوسه عشان يحجز طيارة تانية. كنت عارف إنه حرامي بس دفعت له وقعدت أراقبه بما إني وصلت المطار بدري شوية فقلت أتسلى. لقيته راح لواحد تاني وتالت ورابع بيكرر نفس الحيلة. رحت له وقلت له إنت حرامي فقال لي طب تعالى معايا خد فلوسك لو مش مصدقني … وأي هري

بعدها بشوية لقيت واحد ليبي، بيقول لي نفس الموضوع بنفس التفاصيل، طيارة فاتته ومحتاج فلوس عشان يكملها، ومعاه نفس ورق الاثبات

باختصار، فيه قصص نجاح مبهرة للعرب والمسلمين في الغرب، بس فيه قصص زي الزفت بتدمر سمعتك وسمعة الإسلام تماما

كنت بسأل دايما، ليه الإسلام مش منتشر هناك رغم إنهم مش بيمانعوا من الدعوة له. بالعكس خد راحتك. لقيت إن سمعة المسلمين السيئة غالبة عليهم … في النهاية محدش هيهتم إن فيه عالم مسلم ناجح لإن العلماء عندهم كتير … لكن هيهتموا بحرامي مسلم لإن الحرامية مش كتير، ولإن القصص دي دايما ملفتة للانتباه

أحمد قال لي إن الغرب عليه دور كبير في الجرائم دي لإنه مش بيدعم الجاليات دي وبيفرق في معاملتهم ثقافيا واجتماعيا، ومن هنا بتنشأ الجريمة من شخص ناقم على مجتمعه. الاستثناء كان انجلترا لما قررت تتعامل مع الجالية الباكستانية كمواطنين انجليز لهم نفس الحقوق والمعاملات، والنتيجة إن الباكستانيين مندمجين جدا في انجلترا وهويتهم بقت هوية البلد اللي عايشين فيها … بعكس تعامل دول اوروبية كتير مع الجاليات العربية زي بلجيكا

جدير بالذكر إن الجاليات دي اتكونت من طبقة العمال اللي أعادت إعمار أوروبا بعد الحرب العالمية التانية، أوروبا كانت محتاجة تتبني من أول وجديد والرجالة ماتوا في الحرب، فاستلفت عمالة من كل دول العالم

جدير بالذكر برضة إن عبد الناصر رفض إرسال عمالة مصرية هناك

Comments

comments