الحجاب ..هوية
لفت انتباهي حد كان بيتكلم النهاردة عن “احساس الاغتراب” وسط مجتمع غير مسلم ، و صفحة تانية كانت حاطة فيديو عن تجربة لبنات مسلمات في كندا لعمل يوم عن الحجاب ممكن فيه البنات الكنديات يجربوا يلبسوا الحجاب من باب التبادل الثقافي ، فقلت أحكي عن لمحة من تجربتي كمسلمة محجبة في أمريكا.
مبدئياً أول لما وصلت أمريكا كنت متخيلة ان الناس حيبصوا لي ككائن فضائي أو حيعاملوني معاملة وحشة أو حيبقوا عنصريين معايا .. لقيت العكس تماماً.
-في أول أسابيع وصولي راجل عجوز بص لي في الشارع و ابتسم لي ، و بعدين راح منحني باحترام شديد .. و أنا طبعاً اتبرجلت و معرفتش أتصرف!
-من المعتاد جداً اني ألاقي ناس معرفهومش يقولوا لي طرحتك حلوة أو يسألوني هو الايشارب اللي انتي لابساه على راسك ده اسمه ايه و يحاولوا يحفظوا اسمه بالعربي.
-كذا حد كان يبتسم لما يشوفني في الشارع و يقول لي “السلامو أللليكم” .. آه كانوا بيبطقوها كده!
-ساعات فيه ناس بتضبطهم بيبصوا لك من بعيد لبعيد باستغراب أو على وجه الدقة .. بتتنيح! بس أول ما عينك تيجي في عينهم بيقوموا مدورين وشهم بسرعة من الكسوف.
-أحياناً كان ممكن ناس تسأل من باب الفضول هو انتي لابسة طرحة ليه؟ أو بتفضلي لابساها على طول؟ بس معظم الناس بتعتبر ده تعدي على الخصوصيات.
-الناس اللي من أصول ثقافية معينة زي أمريكا اللاتينية و الهند بيبقوا متعودين على شكل الحجاب لأن ثقافتهم محافظة. فمثلاً فيه مرة سيدة عجوزة طيبة من أمريكا اللاتينية قالت لي انت شكلك بالحجاب بيفكرني بالسيدة مريم العذراء. مرة تانية واحد قال لي أنا اتربيت في بورتريكو في قرية كان كل سيداتها بما فيهم أمي بيغطوا شعرهم.
-في وقت من الأوقات دَرِست في برنامج لتعليم العربية لطلبة ثانوي و كان عندي تلميذة أمريكية اسمها جين أصرت تخليني ألف لها الحجاب عشان تتصور بيه و تفرج عيلتها على الصورة .. و كانت طايرة بالصورة.
-لما جيت أعدي آخر مرة من مطار لوس انجلوس شاوروا لي آجي على جنب و ما أعديش من الجهاز اللي بيعمل full body scan و أروح لموظفة تتولى هي تفتيشي احتراماً للتقاليد الدينية.
- الحجاب طبعاً علامة مميزة على انك مسلمة فبتبقي صيدة ثمينة لأي حد بيحب يعمل دعاية لدينه سواء مسيحي أو حتى ساينتولوجي! بس عادي .. كله هنا بيعمل دعاية لدينه حتى المسلمين فعادة الواحد بيرفض بأدب أو بيختصر الحوار.
-السفر علمني معنى مهم جداً عن الحجاب هو معنى “الهوية”. الحجاب في الغرب لا ينطبق عليه معنى درء الفتنة المتعارف عليه في الشرق لأن الفتنة في كل مكان. الحجاب هو “هوية” حضرتك ماشية بتعلنيها بفخر مكان ما تروحي انك .. مسلمة.
-مفيش حاجة كاملة ، أكيد الواحد اتعرض لموقف أو اتنين عنصريين ، أكيد فيه ناس مبيبقوش فاهمين ايه حدود التعامل المقبولة في الأول ، بس بشكل عام الناس في الغرب (على حسب تجربتي) عندهم مساحة لاحترام تقاليد الآخر و دينه أكبر بكتير من المساحة اللي عندنا في بلاد المسلمين.

Comments

comments