سواء كانت نتيجة التنسيق رغبتك الأولى أو التانية أو حتى العاشرة، فمهم تسمع الكلمتين دول …

مفيش حاجة إسمها تعليم في جامعات مصر … مفيش … فمن الأول كدة بالمختصر المفيد متضيعش وقتك في الكلية !

في صيدلة، كنت بدرس منهج متغيرش من أكتر من ٤٠ سنة … تخيل … العلم بيتغير كل يوم وأنا بادرس منهج عقيم انتهى من الحياة تماماً. متوقع يعني بعد ما أذاكر المنهج الجميل ده وأحفظه، أطلع أضيف للعلم إيه؟! كل المناهج بقى على نفس الشاكلة … وياريت حتى المطلوب تفهم … لأ .. تحفظ … تحفظ كتير … وبعدين تمتحن … وبعدين تنسى اللي حفظته … طب حفظته ليه؟ … عشان تنجح في الامتحان؟! … طب امتحنت أصلاً ليه؟ … عشان تتخرج وتشتغل … بس أنا هتخرج حافظ مش فاهم … ونسيت اللي حفظته كمان … لا .. ما هو مجال العمل مختلف تماماً عن اللي درسته في الكلية يا معلم … ده حاجة وده حاجة تانية خالص … طب درسته ليه؟! عشان التعليم في بلدنا كدة؟! … طب ما تغيروا المناهج؟! … لأ

كان عندنا مادة اسمها العقاقير … بندرس فيها النباتات الطبية … كنا في كل ترم بندرس حوالي أكتر من ٥٠ نبات … وكانوا بيطلبوا مننا نحفظ تعريف كل نبات … جملة كدة طويلة من سطرين فيها كلمتين باللاتيني … كنت هاتجنن … أحفظهم تعريف النبات ليه يعني؟! … أحفظ جملتين وكلام باللاتيني ليه … ما هو مكتوب في الكتب … يوم ما أحتاجه أبقى افتح الكتاب … ده لو احتجته أساساً …
رحت لدكتورة المادة وسألتها … حضرتك أحفظ أكتر من ٥٠ تعريف للنباتات دي ليه؟! … عشان تعرف وصفهم العلمي … طب هو حضرتك فيه كام نبات طبي في الكون؟ … آلاف … حضرتك حافظة تعريفاتهم كلها؟! … لأ … فيه أي عالم في الدنيا حافظ تعريفاتهم كلها؟! … لأ … طب إشمعنى عاوزينا إحنا نحفظ تعريفاتهم؟! … عشان هو التعليم كدة وبعدين إنت بتتكلم كتير ليه؟!

ياريتها جت بس على التعريفات … ده إنت بتحفظ شكل المركبات الكيميائية بتاعتهم (المركب الكيمائي الواحد فيه مش عارف كام حلقة بنزين وكام رابطة أيوينة وحاجات متلتلة) … وتحفظ شكلهم تحت الميكروسكوب … وطريقة تمييزهم من بعض … لو حطيت المادة الفلانية على النبات ده هيطلع لون كذا بينما النبات ده هيطلع لون كذا … احفظ يا معلم … احفظ احفظ احفظ ومتسألش إنت بتحفظ إيه وليه؟! … ييجي الإمتحان … رجع اللي حفظته … انسى كل حاجة … وخلاص … خلصت !

كل المواد كدة … أنا قضيت فترة طويلة من حياتي باحفظ إزاي أرسم على الورق أجهزة تصنيع الدواء … وبعد ما اتشليت وحفظت ونسيت وحفظت ونسيت وحفظت وامتحنت ونجحت … اكتشفت إن كل الأجهزة دي اتلغت أصلاً من الأسواق … دار عليها الزمان دورته والعلماء ابتكروا أجهزة أحدث ألف مرة … وآخر استخدام ليها كان من عشرات السنين … يعني أنا فيه أيام من حياتي ضاعت ع الفاضي عشان ذاكرت الكلام الفاضي بتاعكم ده

ده غير الدكاترة بقى … شوف … معظم الدكاترة (معظمهم وليس كلهم) .. هم شوية ناس معقدة نفسياً … كانوا بيعرفوا يحفظوا كويس في الجامعة وجابوا تقدير واشتغلوا في الجامعة كموظفين … موظفين مش علماء … فاهم الفرق؟ … هم معندهمش حاجة تفيدك … هم حافظين كلمتين وبيرددوهم كل سنة للطلبة … بس … نادراً ما تصطدم بحد ممكن تستفيد منه فعلاً … الناس اللي ممكن تستفيد منها دي مش بتعيش في البلد دي … الناس دي بتسافر تشتغل وتعمل أبحاث عشان تفيد البشرية … مش تقعد هنا تتخانق مع الطلبة إنهم يشتروا الكتاب عشان يجمعوا قرشين !

كمان … مش مهم التقدير لإن مفيش حد في سوق العمل دلوقتي بيسأل عليه أصلاً … أنا اشتغلت صيدلي في صيدليات العزبي ومحدش سألني تقديرك إيه؟ عشان كله عارف إن التعليم في مصر كلام فاضي وإن سوق العمل مالوش علاقة بالتعليم … لما عملت الانترفيو في العزبي، كان معايا واحد تقديره امتياز وأنا تقديري جيد … كان بيجاوب علي كل الاسئلة العلمية في الانترفيو بينما أنا جاوبت نصهم بس والباقي كنت باقول مش عارف … اختاروني أنا وهو لأ عشان قالوا إني شخص قابل للتعلم … بينما هو شخص حافظ صم وخلاص !
ولما اشتغلت في الجزيرة معرفوش إني صيدلي غير بعدها بست شهور … لإن الناس مش بتدور على شهادتك … الناس بتدور إنت بتعرف تعمل إيه

م الآخر … عشان تستفيد من سنين الكلية صح … فاعرف إنت عاوز تعمل إيه بالضبط بعد التخرج … وعلم نفسك بنفسك … خد كورسات في المجال اللي عاوز تشتغل فيه … اتعلم أقل حاجة لغتين لو قدرت … كل سنتين لغة … شارك في كل الانشطة المهمة اللي لها علاقة بشغلك أو بالثقافة عموماً … احضر ندوات مهمة … ومع الوقت هتعرف إيه هي النشاطات والندوات المهمة وإيه هي الحاجات الفكسانة … متحضرش محاضرات ملهاش لازمة … لو لقيت محاضرات ليها لازمة احضرها مش هتخسر حاجة … ومتذاكرش إلا عشان تنجح … بس انجح ومتضيعش سنين من عمرك في الكلية

عاوز تتعلم … هتعلم نفسك بنفسك … هتتعلم بعيد عن الكلية … من الكورسات والكتب … وهتتعلم الحياة وخبرتك هتزيد لما تشارك في نشاطات مختلفة … واشتغل أو اتدرب في مكان له علاقة بالمجال اللي عاوز تشتغل فيه في الصيف أو حتى أثناء الكلية لو تقدر !

المهم … متضيعش سنين الكلية في كلام فاضي … عشان التعليم في جامعات مصر كلام فاضي … إلا قليلا !

 علم نفسك بنفسك

Comments

comments