بما إن حضانة بنتي قريبة من البيت ، فبنروح مش كل يوم طالما الجو كويس ، بأحاول استغل الوقت ده في تعليمها حاجات مختلفة بطريق غير مباشر ( كنت باعمل كدة دايما مع اخواتها ).
يعني مثلا و احنا ماشيين ، اسألها مفروض دلوقتي نمشي يمين و لا شمال ؟ و أخليها هي تقول ، و اصلحلها لو قالت غلط .
بعد أول مرتين ، بدأت أخليها هي تقولي مفروض نمشي في انهي طريق علشان نروح الحضانة ، أو البيت و احنا في طريق الرجوع .
اذا تعبت من الطريق ، بأحاول اشغلها بإن إحنا نعد لحد 20 ( هي بتعرف تعد لحد 10 ) ، نعد الشجر اللي في الطريق، أو البيوت اللي بنمر عليها .
أول ما بنخرج من البيت ،بنقول مع بعض دعاء الخروج من المنزل ، و اذا رحنا بالسيارة، فبنقول دعاء ركوب الدابة أول ما بنركب.
كنت أوقات بأحاول أعلم أولادي إماطة الأذى عن الطريق، فلو لقينا أذى في الشارع، فابعده عن الطريق ، و اتكلم معاهم عن إن الرسول عليه الصلاة و السلام أمرنا بكدة .
باعلمهم التسبيح و حمد الله و احنا ماشيين ، و باحاول أوصل لهم إن الشجر لما هما بيسبحوا ، بيسبح هو كمان معاهم .
التعليم الغير مباشر، أفضل كتير جدا للطفل من التعليم المباشر، خاصة اذا ابنك لقاك بتعمل الحاجة اللي بتعلمهاله بنفسك

10635943_10152667059097171_290464570973751498_n

Comments

comments