حضانات الأطفال في ألمانيا

1- في حضانة بنتي ، معتمدين على نظام المجموعة المشتركة ، يعني المجموعة الواحد فيها أعمار مختلفة ( 3 مراحل عمرية ، من سن 3 سنوات لحد 6 )، و بيتقسموا داخل المجموعة الواحدة لثلاثة مجموعات ..
أول امبارح رحت لقيتهم معلقين جدول برة المجموعة ، فيها تقسيم الواجبات ، كل طفل قديم ، مسؤول عن طفل جديد داخل المجموعة ..
يعني طفل عنده 4 سنوات مثلا و بقاله سنة في الحضانة ، فهو مسؤول عن طفل جديد عمره 3 سنوات ..
مسؤول عنه يعني … يساعده في المجموعة ، يعمله ازاي يرتب الطرابيزات وقت الأكل، يعرفه النظام في المجموعة ماشي إزاي و هكذا .
لما رحت أجيب بنتي ، سمعت بنت بتكلم مامتها و سعيدة جدا و هي بتقولها هي أصبحت النهاردة مسؤولة عن مين .
الطفل بيتعلم إنه يبقى مسؤول عن شخص ما ، من و هو في عمر أربع سنوات

2- موقف السيارات اللي عند الحضانة ، بيخدم أكثر من مؤسسة ، و كلهم خاصيين بالأطفال و الطلبة ، لحد 3 سنوات فاتت، الموقف ده كان بيجي عليه أوقات ما بتلاقيش مكان لعربية تركن فيه ، و غالبا بيكون الصبح ، على الساعة 2 الظهر تقريبا ، الكل يا إما جاي بأولاده الصبح، أو جه ياخدهم للبيت .
في الغالب كان الناس بتركن و ممكن تطول جدا لحد ما تجيب أولادها ، يا امابتقف فترة طويلة مع أولادها، أو بيقابلوا اصحابهم و يرغوا ، أو بيتكلموا مع المشرفين عن أولادهم في مشكلة ما .
من 3 سنوات لقيناهم حطوا يفط على أماكن معينة في الموقف ( مش في الموقف كله )، بتحدد وقت ركن السيارات في الأماكن ده بنصف ساعة فقط لا غير ، يعني إذا هتركن عربيتك هنا مفروض تعمل حسابك إن معاك أقصى حاجة نصف ساعة ، بعدها هتاخد غرامة ، إذا عارف انك هتطول عن النصف ساعة، وقتها اركن في الأماكن مفتوحة الوقت .
مجموعة اليفط ده ، ظبطت الدنيا بشكل كبير جدا ، حاليا بتورح في أي وقت ، يا اما بتلاقي مكان مباشرة، واو بتنتظر وقت قليل جدا علشان تقدر تركن عربيتك .

Comments

comments